Американскиот експерт за инфективни болести предвидува нов застрашувачки замав на пандемијата на коронавирусот во САД и предупредува на опасност од ширење на британскиот сој на коронавирусот.

Мајкл Остерхолм, американски експерт за инфективни болести, предупредува дека на САД му се заканува „невреме од 5-та категорија во облик на нов и позаразен вид на вирусот SARS-CoV-2, кој што првобитно беше откриен во Велика Британија“.

„Ќе видиме нешто кое што досега не сме го виделе во оваа земја“, порачал Остерхолм и додал дека Американците не треба да се „опуштаат“ поради падот на бројот на новозаразени од коронавирусот во нивната земја.

„Замислете каде се наоѓаме моментално, седиме на некоја плажа каде што има пријатна температура и совршено сино небо и нежен ветер. Но, гледам ураган од 5-та категорија, на 700 километри од крајбрежјето. Да им кажете на луѓето да се евакуираат во текот на денот – тешко. Но, можам да ви кажам дека тој ураган доаѓа“, уверува американскиот експерт кој своето мислење го искажал во текот на гостувањето во неделната емисија на „NBC“ – „Meet The Press“.